Virðulegi forseti. Það má öllum vera ljóst sem fylgst hafa með umræðum um efnahagsmál að það hafa staðið miklar deilur um gjaldeyrishöftin alveg frá því vorið 2009. Í efnahagstillögum okkar sjálfstæðismanna sem við settum fram í þingsályktunartillögu vorið 2009 var lýst leiðum hvernig mætti losna úr gjaldeyrishöftum og sumt af þeim tækjum sem þar var talað um er verið að nota í dag. Við endurtókum þetta haustið 2009 og 2010 og töluðum um hvað væri brýnt að afnema gjaldeyrishöftin til að íslenskt efnahagslíf gæti náð sér á strik.

Hæstv. fjármálaráðherra og hæstv. efnahagsráðherra halda því fram að þetta sé stuðningsyfirlýsing við efnahagsstefnu og stjórn ríkisstjórnarinnar. Við þessa herramenn vil ég segja: Fyrir ykkur gæti legið að verða atvinnuspaugarar ef þið dettið út af Alþingi. [Hlátur í þingsal.]