Virðulegi forseti. Ég vil vekja athygli á því að ég flyt breytingartillögu í þeirri atkvæðagreiðslu sem við förum nú í. Hún er í anda þess sem Sniglarnir, Slóðavinir, Ökukennarafélag Íslands og Biking Viking ehf. hafa verið að benda á í þessu máli en skattleggja á bifreiðar á miðað við hvað þær menga mikið. Bifhjól menga hlutfallslega lítið og það eru því ákveðin rök fyrir því að þau fari í 15% vöruflokkinn. Það eru líka rök fyrir því að bifhjól fái sömu meðferð og bílaleigubílar, þ.e. bifhjól sem fara í leigu. Það eru jafnframt ákveðin rök fyrir því að bifhjól sem notuð eru til kennslu fái sömu ívilnun og kennslubifreiðar. Það er réttlætismál, það er rökrétt, þannig að ég skora á hv. þingmenn að greiða atkvæði með breytingartillögunni sem sú er hér stendur flytur af því að það er ekki rétt að fara öðruvísi með bifhjól en bifreiðar.