frávik vegna styrkja úr sjóði er fjármagnar aðstoð við umsóknarríki Evrópusambandsins.
Hæstv. forseti. Þessum spurningum hv. þingmanns má svara jákvætt. Auðvitað er niðurlægjandi fyrir okkur að svara fjandsamlegum aðgerðum af hálfu Evrópusambandsins með því að biðja þá um styrki á sama tíma. Það er líka mikið vafamál, burt séð frá Icesave-deilunni, makríldeilunni og öllu slíku, hvort vel fari á því yfir höfuð þegar aðilar eru að semja að annar aðilinn sé hinum háður. Það er vafamál hvort vel fer á því að á sama tíma og við semjum við Evrópusambandið um atriði sem okkur finnst skipta veigamiklu máli eins og á sviði sjávarútvegsmála eða landbúnaðarmála, séum við að reyna að kría út styrki úr Evrópusambandinu. Það hlýtur auðvitað að hafa áhrif á samningsstöðu manna þegar þeir eru í þeirri aðstöðu. Það fer auðvitað ekki vel á því, ef við lítum á Ísland og Evrópusambandið sem (Forseti hringir.) tvo sjálfstæða aðila sem eiga í samningaviðræðum, að annar aðilinn sé á sama tíma að gerast hinum háður.