ráðgefandi þjóðaratkvæðagreiðsla um tillögur stjórnlagaráðs að frumvarpi til stjórnarskipunarlaga.
Virðulegi forseti. Ég er sammála því að alþingismenn eigi almennt að virða þrígreiningu ríkisvaldsins. Þegar Hæstiréttur dæmdi stjórnlagaþingskosninguna ógilda gerði hann það í rauninni ekki sem hinn æðsti dómstóll, heldur sem einhvers konar stjórnsýslunefnd eða æðra úrskurðarvald á stjórnsýslustigi. Því miður ber það vott um hve illa lögin voru úr garði gerð hjá þeim þingmönnum sem lögðu þau til. Á því ber ríkisstjórnin ábyrgð.
Ég reikna ekki með því að ég og þingmenn Sjálfstæðisflokksins náum saman um þá ráðatilhögun.
Ég benti á breytingartillögu sem var lögð fram við þetta tilefni. Þá komu þingmenn Hreyfingarinnar og sögðu: Við viljum leggja fram þá breytingartillögu að áður en Alþingi fái að fjalla um frumvarpið, sem á að koma frá stjórnlagaráði, fari fram þjóðaratkvæðagreiðsla. Sú tillaga var felld. Það er það sem ég er að benda á. Nú á hins vegar að framkvæma það sem Hreyfingin fór fram á og var fellt með 42 atkvæðum. Það er það undarlega í þessu öllu saman. (Gripið fram í.) Þá komum við að því hvort ástæða þess að við erum hér séu pólitísk hrossakaup. Ég er ekki reiðubúinn að standa að slíku.