umræður um veiðigjöld og frumvarp um stjórn fiskveiða.
Frú forseti. Ég geri alvarlegar athugasemdir við dagskrá fundarins í dag. Hér á að ræða veiðigjaldið eða veiðiskattinn en hann hlýtur að vera háður kerfinu sjálfu. En málið um framtíð kerfisins er enn þá í nefnd auk þess sem þar eru hugmyndir frá mér um eignarhald á kvótanum sem ég vildi gjarnan að yrðu ræddar og eðlilegt væri að ræða í samhengi við hitt málið í nefndinni sem fjallar einnig um eignarhald á kvótanum.
Ég geri tillögu til forseta að þetta mál verði núna tekið af dagskrá. Síðan verði öll þrjú málin rædd samtímis á fundi. Þá geta hv. þingmenn tjáð sig í fyrsta lagi um eignarhaldið á kvótanum, hvernig það eigi að vera, í öðru lagi um framtíð kerfisins og síðan getum við rætt um skattlagningu og annað slíkt, það að hræra í pottinum eins og sumir kalla það.