Aðrar útgáfur af skjalinu: PDF - Word Perfect. Ferill málsins.
140. löggjafarþing 2011–2012.
Þingskjal 1272  —  550. mál.



Svar


innanríkisráðherra við fyrirspurn Helga Hjörvar um starfsmannastefnu ráðuneytis
og undirstofnana varðandi atvinnuþátttöku fatlaðs fólks.

    1.     Hafa ráðuneytið og undirstofnanir þess markað sér stefnu sem atvinnuveitendur um hvernig auðvelda megi ráðningar fatlaðs fólks í samræmi við lög um málefni fatlaðs fólks, nr. 59/1992, sbr. 29. og 32. gr. laganna og 27. gr. sáttmála Sameinuðu þjóðanna um réttindi fatlaðs fólks?
    Ráðuneytið hefur ekki markað sérstaka stefnu um hvernig auðvelda megi ráðningar fatlaðs fólks. Við ráðningar í laus störf er tekið mið af 32. gr. laga nr. 59/1992, um málefni fatlaðs fólks. Ekki hefur reynt á 29. gr. laganna. Að sjálfsögðu yrði brugðist við í samræmi við 29. gr. ef fatlaður einstaklingur hæfi störf í ráðuneytinu. Flestar undirstofnanir ráðuneytisins hafa heldur ekki markað sérstaka stefnu um hvernig auðvelda megi ráðningar fatlaðs fólks en þó ber að taka fram að í starfsmannastefnu lögreglunnar á höfuðborgarsvæðinu má finna stefnu er snýr að fötluðum einstaklingum. Þar er skýrt tekið fram að jafnræði sé leiðarljós LRH og leitast skuli við að tryggja jöfn tækifæri allra til starfa.

    2.     Hafa ráðuneytið og undirstofnanir þess gripið til viðeigandi ráðstafana til að ráða fatlað fólk til starfa og þá hvaða?
    Viðeigandi ráðstafanir ráðast af því hvaða fötlun einstaklingar glíma við. Ef á reynir mun ráðuneytið grípa til þeirra ráðstafana sem þarf til að tryggja góð starfsskilyrði.
    Svör flestra stofnana eru í samræmi við svar ráðuneytisins. Sýslumaðurinn á Seyðisfirði hefur verið í samstarfi við Þroskahjálp og svæðisskrifstofu um málefni fatlaðra á Austurlandi, Landhelgisgæslan í samstarfi við Öryrkjabandalag Íslands og Flugmálastjórn Íslands hefur einnig leitað til Öryrkjabandalags Íslands.

    3.     Hafa forstöðumönnum ráðuneytisins og undirstofnana verið kynnt ákvæði samnings Sameinuðu þjóðanna um viðeigandi ráðstafanir til að auka atvinnuþátttöku fatlaðs fólks?
    Ráðuneytið þekkir ákvæði samnings Sameinuðu þjóðanna. Engin formleg kynning hefur farið fram af hálfu ráðuneytisins til handa stofnunum en á svörum þeirra má sjá að allnokkrar þeirra hafa kynnt sér efni hans.

    4.     Hafa forstöðumönnum ráðuneytisins og undirstofnana verið kynntar breyttar áherslur hvað varðar þátt umhverfishindrana og viðhorfstengdra tálma í fötlun?
    Ráðuneytið þekkir þær áherslur sem gilda um umhverfishindranir. Stofnunum hafa ekki verið kynntar breyttar áherslur með formlegum hætti en nokkrar stofnanir hafa farið út í breytingar á húsnæði sínu til að auka aðgengi.

    5.     Hversu margir fatlaðir starfa hjá ráðuneytinu og undirstofnunum þess og hversu hátt hlutfall er það af starfsmannafjölda þeirra?
    Enginn fatlaður einstaklingur starfar í ráðuneytinu.
    Í dag eru nokkrir fatlaðir einstaklingar að störfum hjá eftirtöldum stofnunum: Vegagerðinni, lögreglunni á höfuðborgarsvæðinu, sérstökum saksóknara, Þjóðskrá Íslands, sýslumanninum á Seyðisfirði.