þskj. 1670 # prentað svar menntmrh., 140. lþ. 797. mál: #A stuðningur ríkisins við þátttöku Íslendinga á Ólympíuleikunum í London # fsp. (til skrifl.) til menntmrh.

Aðrar útgáfur af skjalinu: PDF - Word Perfect. Ferill málsins.

140. löggjafarþing 2011–2012.
Þingskjal 1670 — 797. mál.

Svar

mennta- og menningarmálaráðherra við fyrirspurn Höskuldar Þórhallssonar
um stuðning ríkisins við þátttöku Íslendinga á Ólympíuleikunum í London.

    Fyrirspurnin hljóðar svo:
    Eru uppi frekari áform um stuðning ríkisins við þátttöku íslenskra íþróttamanna á Ólympíuleikunum í London í sumar?

    Undirbúningur fyrir Ólympíuleikana í Lundúnum stendur nú sem hæst og stefnir í að þátttaka íslenskra íþróttamanna verði með mesta móti en 24 keppendur hafa tryggt sér keppnisrétt á leikunum nú þegar. Enn er möguleiki fyrir íslenska íþróttamenn í nokkrum greinum að tryggja sér þátttökurétt en lokafrestur er 8. júlí nk. Heildarkostnaður Íþrótta- og Ólympíusambands Íslands við þátttöku á leikunum er áætlaður um 100 millj. kr.
    Stuðningur ríkisins vegna Ólympíuleikanna á þessu ári er samtals 32,8 millj. kr. Annars vegar er í fjárlögum 2012 tímabundið framlag til ÍSÍ vegna ólympískra verkefna að fjárhæð 17,8 millj. kr. Hins vegar samþykkti ríkisstjórn á fundi sínum þann 8. maí sl. að veita ÍSÍ 15 millj. kr. til viðbótar til að mæta kostnaði við þátttöku á leikunum. Að auki var framlag úr ríkissjóði til afrekssjóðs í fjárlögum ársins 2012 hækkað um 40%, eða um 10 millj. kr. Ekki eru uppi áform um frekari stuðning af hálfu ríkisins.