Ferill 289. máls. Aðrar útgáfur af skjalinu: PDF - Word Perfect.
144. löggjafarþing 2014–2015.
Þingskjal 474 — 289. mál.
Svar
sjávarútvegs- og landbúnaðarráðherra við fyrirspurn frá Birni Val Gíslasyni
um flutning stofnana.
Er fyrirhugað að flytja höfuðstöðvar eða starfsstöðvar einhverra þeirra stofnana sem undir ráðherra heyra? Ef svo er, óskast greint frá því hvaða starfsemi á í hlut og hvaðan og hvert starfsemin verður flutt.
Undir sjávarútvegs- og landbúnaðarráðherra heyra Byggðastofnun, Fiskistofa, Hafrannsóknastofnun, Matís og Matvælastofnun. Höfuðstöðvar Byggðastofnunar eru á Sauðárkróki og Matvælastofnunar á Selfossi. Ráðherra hefur kynnt áform um flutning höfuðstöðva Fiskistofu til Akureyrar.
Allar stofnanirnar eru með starfsstöðvar utan höfuðstöðva. Í stjórnarsáttmála ríkisstjórnarinnar segir m.a. að mikilvægt sé að stuðla að fjölbreyttum atvinnutækifærum um allt land, m.a. með dreifingu opinberra starfa. Ráðherra hefur því lagt á það áherslu við forstöðumenn umræddra stofnana að leitast við að verja dreifða starfsemi og efla starfsstöðvar með það að markmiði að auka framboð opinberra sérfræðistarfa á landsbyggðinni.