Ferill 101. máls. Aðrar útgáfur af skjalinu: PDF - Word Perfect.
144. löggjafarþing 2014–2015.
Þingskjal 1561 — 101. mál.
Síðari umræða.
Nefndarálit
um tillögu til þingsályktunar um athugun á hagkvæmni lestarsamgangna.
Frá minni hluta umhverfis- og samgöngunefndar.
Nýlega var samþykkt nýtt svæðisskipulag fyrir höfuðborgarsvæðið af öllum sveitarfélögunum á höfuðborgarsvæðinu. Um metnaðarfulla áætlun er að ræða og fagnaðarefni að öll sveitarfélögin skuli sammælast um framtíðarsýn í skipulagsmálum. Í svæðisskipulaginu er gert ráð fyrir lestakerfinu sem hér er fjallað um og lagt til að það verði kannað nánar. Að mati minni hlutans er rétt að sveitarfélögin hefji könnun sjálf á sínum eigin forsendum áður en ríkissjóður leggur út í kostnað vegna verkefnisins.
Um er að ræða fyrirkomulag samgöngumála innan sveitarfélaganna og framtíðarsýn þeirra í þeim efnum sem rétt er að sveitarfélögin sjálf veiti forustu um að rannsaka. Á það sérstaklega við um jafn dýra framkvæmd og hér um ræðir. Má í því sambandi nefna að fyrir nefndinni kom fram að hluti hraðlestakerfisins kunni að verða neðan jarðar þegar lestin kemur inn í byggðina syðst í Hafnarfirði og þar til hún kemur að tengistöð við léttlestakerfið og mundi sú tenging væntanlega vera miðsvæðis í Reykjavík.
Með hliðsjón af því sem að framan greinir telur minni hlutinn ekki tilefni til þess að taka efnislega afstöðu til málsins á þessu stigi.
Alþingi, 30. júní 2015.
Birgir Ármannsson, frsm. |
Haraldur Einarsson. | Vilhjálmur Árnason. |