Ferill 141. máls. Aðrar útgáfur af skjalinu: PDF - Word Perfect.
146. löggjafarþing 2016–2017.
Þingskjal 376 — 141. mál.
Svar
dómsmálaráðherra við fyrirspurn frá Gunnari I. Guðmundssyni um úthaldsdaga Landhelgisgæslunnar.
1. Hversu margir hafa árlegir úthaldsdagar Landhelgisgæslunnar verið frá árinu 2013, sundurliðað eftir árum og skipum, og hversu marga af þeim hefur Landhelgisgæslan verið við eftirlitsstörf?
Á árunum 2013–2016 gerði Landhelgisgæslan alls út sex skip og báta: þrjú stór varðskip (Þór, Týr og Ægi) og þrjá minni báta (Óðin, Leiftur og sjómælingabátinn Baldur). Varðskipin þrjú gegna lykilhlutverki við löggæslu og eftirlit á Íslandsmiðum en minni bátarnir þrír hafa líka reynst mjög drjúgir við slík störf, t.d. þegar strandveiðitímabilið stendur sem hæst. Hér á eftir eru tilgreindir dagarnir sem þessi skip voru á sjó á árunum 2013–2016. Dagarnir sem varðskipin sinntu erlendum verkefnum, t.d. í Miðjarðarhafi á vegum Landamæra- og strandgæslustofnunar Evrópu (Frontex) eru ekki meðtaldir.
Úthaldsdagar varðskipa Landhelgisgæslunnar 2013-2016.
Ár | Þór | Týr | Ægir | Baldur | Leiftur/ Óðinn |
Samtals |
2013 | 107 | 105 | 36 | 23 | 30 | 301 |
2014 | 159 | 5 | 73 | 113 | 36 | 386 |
2015 | 236 | 0 | 15 | 41 | 5 | 297 |
2016 | 170 | 141 | 0 | 82 | 12 | 405 |
Allar ferðir varðskipa á Íslandsmiðum eru í eðli sínu eftirlitsferðir. Þótt öðrum verkefnum, t.d. æfingum, sé sinnt meðan á ferðum varðskipanna stendur er virk vöktun og eftirlit stöðugt í gangi frá því skipin leggja úr höfn. Því er ekki tiltekið sérstaklega hve marga daga skipin voru við eftirlitsstörf.
2. Hversu oft hafa varðskip Landhelgisgæslunnar tekið eldsneyti, þ.m.t. á Íslandi, sundurliðað eftir dagsetningu, löndum og magni?
Landhelgisgæslan hefur sett olíu á varðskip í 32 skipti frá 1. janúar 2013. Hluti þeirrar olíu sem keypt var í útlöndum var vegna erlendra verkefna á árunum 2013–2015, þ.m.t. hluti af olíunni sem keypt var í Færeyjum.
Olíukaup á varðskip eftir löndum frá 1. janúar 2013 – 24. febrúar 2017.
Land | Færeyjar | Ísland | Ítalía | Spánn | Malta |
Lítrar | 5.270.288 | 274.606 | 148.834 | 393.855 | 569.654 |
Dags. | Upphæð | Magn (lítrar) | Land |
5.1.2013 | 14.636.248 | 139.020 | Færeyjar |
21.2.2013 | 73.652.410 | 650.086 | Færeyjar |
31.7.2013 | 12.811.543 | 128.341 | Spánn |
31.8.2013 | 6.824.975 | 70.000 | Færeyjar |
30.9.2013 | 8.787.555 | 84.868 | Spánn |
22.1.2014 | 60.180.052 | 620.000 | Færeyjar |
17.3.2014 | 3.931.139 | 30.180 | Ísland |
2.5.2014 | 8.007.925 | 86.460 | Ísland |
30.7.2014 | 11.849.718 | 130.003 | Færeyjar |
27.11.2014 | 65.370.336 | 835.000 | Færeyjar |
15.12.2014 | 8.622.374 | 119.852 | Malta |
31.12.2014 | 4.566.681 | 69.913 | Malta |
28.1.2015 | 5.265.200 | 89.889 | Malta |
5.3.2015 | 7.391.427 | 100.000 | Malta |
14.4.2015 | 3.625.099 | 50.000 | Ítalía |
14.4.2015 | 4.020.401 | 60.000 | Malta |
22.4.2015 | 4.369.856 | 60.000 | Malta |
20.5.2015 | 5.355.931 | 70.000 | Malta |
26.5.2015 | 3.901.690 | 40.124 | Ísland |
17.6.2015 | 2.637.328 | 33.835 | Ítalía |
24.8.2015 | 50.248.546 | 880.000 | Færeyjar |
29.9.2015 | 5.846.450 | 99.876 | Spánn |
1.11.2015 | 9.190.498 | 117.842 | Ísland |
4.11.2015 | 4.523.535 | 80.770 | Spánn |
18.11.2015 | 18.435.251 | 371.114 | Færeyjar |
11.12.2015 | 5.003.173 | 100.013 | Færeyjar |
15.12.2015 | 3.962.131 | 64.999 | Ítalía |
27.4.2016 | 2.844.016 | 68.010 | Færeyjar |
3.6.2016 | 30.214.050 | 600.858 | Færeyjar |
21.7.2016 | 6.624.358 | 126.958 | Færeyjar |
12.12.2016 | 6.132.332 | 129.930 | Færeyjar |
14.1.2017 | 27.841.215 | 549.296 | Færeyjar |
3. Hversu marga daga hefur Landhelgisgæslan ekki sinnt eftirlitsstörfum vegna eldsneytistöku annars staðar en á Íslandi?
Eins og fram kemur hér fyrr hefur Landhelgisgæslan undanfarin ár keypt olíu á skip sín á Ítalíu, Spáni, Möltu og í Færeyjum, auk Íslands. Eldsneytiskaup á Ítalíu, Spáni og Möltu tengjast landamæragæslu á vegum Frontex og hafa því ekki sem slík áhrif á eftirlit og löggæslu á Íslandsmiðum. Áhrifin af ferðum varðskipa til Færeyja á gæslustörfin eru einnig hverfandi. Skipin fara jafnan til Færeyja þegar þau eru við eftirlit í austanverðri lögsögunni. Um leið gefst færi á að sinna eftirliti á svæði innan efnahagslögsögunnar sem sjaldan er farið um, þ.e. hafsvæðinu djúpt suðaustur af landinu og á Færeyjahryggnum. Skipin staldra yfirleitt mjög stutt við í Færeyjum, eða rétt sem nemur tímanum sem olíudælingin tekur. Vera varðskipanna utan lögsögunnar er þar af leiðandi sjaldnast meiri en sólarhringur. Í þessu samhengi má líka nefna að Færeyjar eru innan alþjóðlega leitar- og björgunarsvæðisins sem Ísland er ábyrgt fyrir. Því hafa nokkrar þessara ferða verið nýttar til æfinga með dönskum eftirlitsskipum og færeyskum varðskipum.