Ferill 365. máls. Aðrar útgáfur af skjalinu: PDF - Word Perfect.
146. löggjafarþing 2016–2017.
Þingskjal 740 — 365. mál.
Síðari umræða.
Nefndarálit
um tillögu til þingsályktunar um staðfestingu ákvörðunar sameiginlegu EES-nefndarinnar nr. 100/2016 um breytingu á XX. viðauka (Umhverfismál) við EES-samninginn.
Frá utanríkismálanefnd.
Nefndin hefur fjallað um málið og fengið á sinn fund Finn Þór Birgisson og Steinlaugu Högnadóttur frá utanríkisráðuneyti og Kjartan Ingvarsson frá umhverfis- og auðlindaráðuneyti.
Með tillögunni er leitað heimildar Alþingis til að staðfesta ákvörðun sameiginlegu EES-nefndarinnar nr. 100/2016, frá 29. apríl 2016, um breytingu á XX. viðauka (Umhverfismál), og til að fella inn í samninginn framkvæmdarákvörðun framkvæmdastjórnarinnar (ESB) 2015/2119 um að fastsetja niðurstöður um bestu, fáanlegu tækni (BAT), samkvæmt tilskipun Evrópuþingsins og ráðsins 2010/75/ESB, vegna framleiðslu á þiljum að meginhluta úr viði.
Sex mánaða frestur samkvæmt EES-samningnum til að aflétta stjórnskipulegum fyrirvara var veittur til 29. október 2016. Framsetning tillögunnar telst að mati nefndarinnar í samræmi við 4. gr. reglna um þinglega meðferð EES-mála.
Tilskipun 2010/75/ESB um losun í iðnaði sameinar sjö eldri EES-gerðir um samþættar mengunarvarnir. Markmið hennar er að koma í veg fyrir og takmarka mengun frá tiltekinni starfsemi. Meðal þeirra nýmæla sem felast í tilskipuninni eru ákvarðanir um bestu aðgengilegu tækni (BAT) sem fela í sér að framkvæmdastjórn Evrópusambandsins mun setja fram, í samráði við aðildarríkin og hagsmunaaðila, viðmið varðandi tiltekna starfsemi.
Framkvæmdarákvörðun 2015/2119 setur fram niðurstöður um bestu fáanlegu tækni fyrir framleiðslu á þiljum úr viði. Einungis framleiðsla á tilteknum plötum úr viði í verksmiðju sem afkastað getur meira en 600 m3 á sólarhring fellur undir gildissvið framkvæmdarákvörðunarinnar. Við kynningu gerðarinnar hjá nefndinni kom fram að ekki væri vitað til þess að neitt íslenskt fyrirtæki félli undir gildissvið framkvæmdarákvörðunarinnar.
Framkvæmdarákvörðun framkvæmdastjórnarinnar (ESB) 2015/2119 kallar ein og sér ekki á lagabreytingar, en þar sem móðurgerðin sem ákvörðunin byggist á, tilskipun 2010/75/ESB, kallar á lagabreytingu og hefur enn ekki verið innleidd í landsrétt var ekki lagastoð fyrir hendi til að innleiða ákvörðunina. Sú lagastoð mun fást þegar tilskipun 2010/75/ESB verður innleidd með breytingu á lögum nr. 7/1998, um hollustuhætti og mengunarvarnir.
Nefndin leggur til að tillagan verði samþykkt.
Alþingi, 9. maí 2017.
Jóna Sólveig Elínardóttir, form. |
Ásta Guðrún Helgadóttir, frsm. |
Álfheiður Ingadóttir. |
Birgir Ármannsson. | Bryndís Haraldsdóttir. | Rósa Björk Brynjólfsdóttir. |
Sigmundur Davíð Gunnlaugsson. | Teitur Björn Einarsson. | Vilhjálmur Bjarnason. |