Ferill 76. máls. Aðrar útgáfur af skjalinu: PDF - Word Perfect.
148. löggjafarþing 2017–2018.
Prentað upp.
Þingskjal 140 — 76. mál.
Undirskrift.
Síðari umræða.
Nefndarálit
um tillögu til þingsályktunar um staðfestingu samnings milli Íslands og Færeyja um fiskveiðar innan íslenskrar og færeyskrar lögsögu á árinu 2017.
Frá utanríkismálanefnd.
Nefndin hefur fjallað um málið og fengið á sinn fund Helgu Hauksdóttur, Þorvald Hrafn Yngvason, Pétur G. Thorsteinsson og Katrínu Einarsdóttur frá utanríkisráðuneyti og Jóhann Guðmundsson frá atvinnuvega- og nýsköpunarráðuneyti.
Með tillögunni er leitað heimildar Alþingis til staðfestingar á samningi milli Íslands og Færeyja um fiskveiðar innan íslenskrar og færeyskrar lögsögu á árinu 2017 sem gengið var frá með bréfaskiptum í Reykjavík og Þórshöfn 2. júní og 26. júlí 2017.
Samningurinn kveður á um heimildir aðila til veiða á uppsjávarfiski í lögsögu hvors annars á árinu 2017 og samkvæmt honum eru íslenskum skipum heimilar veiðar á allt að 1.300 lestum af makríl og 2.000 lestum af kolmunna og síld, annarri en norsk-íslenskri, innan færeyskrar lögsögu á árinu 2017.
Fram kemur í greinargerð með tillögunni að á árlegum fundi sjávarútvegs- og landbúnaðarráðherra Íslands og sjávarútvegsráðherra Færeyja sem haldinn var í Þórshöfn í Færeyjum 12.–13. desember 2017 náðist ekki samkomulag um veiðiheimildir Færeyinga í íslenskri lögsögu og um gagnkvæman aðgang að lögsögum ríkjanna vegna veiða á kolmunna og norsk-íslenskri síld árið 2018. Á fundinum bauð Ísland fram óbreyttan samning en Færeyjar kröfðust aukinna heimilda í botnfiski, þar með talið þorski, ásamt því að krefjast þess að allar takmarkanir á löndun loðnu til manneldisvinnslu í Færeyjum og vegna manneldisvinnslu færeyskra vinnsluskipa yrðu afnumdar. Án samkomulags við Færeyjar mun íslenskum skipum ekki verða heimilar veiðar á kolmunna og norsk-íslenskri síld innan lögsögu Færeyja á árinu 2018. Því er í tillögunni lagt til að veiðiheimildir færeyskra skipa í íslenskri lögsögu loðnuvertíðina 2017/2018 verði bundnar þeim fyrirvara að íslenskum skipum séu jafnframt heimilar veiðar á kolmunna og norsk-íslenskri síld innan lögsögu Færeyja á árinu 2018.
Nefndin leggur til að tillagan verði samþykkt óbreytt.
Inga Sæland sat fund nefndarinnar sem áheyrnarfulltrúi og er samþykk áliti þessu.
Alþingi, 29. desember 2017.
| Áslaug Arna Sigurbjörnsdóttir, form., frsm. |
Ari Trausti Guðmundsson. | Birgir Þórarinsson. |
| Bryndís Haraldsdóttir. | Jón Steindór Valdimarsson. | Logi Einarsson. |
| Rósa Björk Brynjólfsdóttir. | Silja Dögg Gunnarsdóttir. | Smári McCarthy. |
