Ferill 311. máls. Aðrar útgáfur af skjalinu: PDF - Word Perfect.
148. löggjafarþing 2017–2018.
Þingskjal 665 — 311. mál.
Svar
dómsmálaráðherra við fyrirspurn frá Albertínu Friðbjörgu Elíasdóttur um starfsemi sérsveitar ríkislögreglustjóra.
1. Hversu mörg stöðugildi heyra undir ríkislögreglustjóra, hvernig skiptast þau eftir deildum og í hvaða umdæmum eru sérsveitarmenn staðsettir?
133 starfsmenn störfuðu hjá embætti ríkislögreglustjóra hinn 1. janúar árið 2018 og var skipting þeirra eftir deildum með eftirfarandi hætti:
Tafla. Starfsmenn hjá embætti ríkislögreglustjóra. | |||
Starfsmenn eftir deildum | Fjöldi | Starfsmenn eftir deildum | Fjöldi |
Almannavarnadeild | 8 | Mennta- og starfsþróunarsetur | 6 |
Alþjóðadeild | 10 | Rekstur, stjórnun | 3 |
Fjarskiptamiðstöð | 19 | Rekstur lögreglubifreiða | 4 |
Greiningardeild | 9 | Rekstur upplýsingakerfa | 8 |
Sérsveit | 46 | Stjórnsýsla, stjórnun | 1 |
Stoðdeild | 8 | Stjórnsýsla, tölfræði | 6 |
Europol | 1 | Ríkislögreglustjóri | 1 |
Löggæsla, öryggi, stjórnun | 3 | ||
Samtals
|
133 |
Sérsveit ríkislögreglustjóra starfar á landsvísu og eru liðsmenn með fasta starfsstöð í Reykjavík og á Akureyri.
2. Hefur verið tekin ákvörðun innan dómsmálaráðuneytis eða hjá ríkislögreglustjóra að leggja niður starfsemi sérsveitarinnar á Akureyri?
Ekki hefur verið tekin nein ákvörðun um að leggja niður starfsstöð sérsveitarinnar á Akureyri, hvorki í dómsmálaráðuneytinu né hjá embætti ríkislögreglustjóra.
3. Hver er stefna dómsmálaráðherra um fjölda stöðugilda sérsveitar ríkislögreglustjóra utan Reykjavíkur?
Samkvæmt 2. gr. reglugerðar nr. 774/1998, um sérsveit ríkislögreglustjóra, er allt forræði sveitarinnar hjá embætti ríkislögreglustjóra. Þar af leiðandi er það alfarið í höndum ríkislögreglustjóra að meta þörf á liðsmönnun og dreifingu sveitarinnar á landsvísu hverju sinni.