Ferill 453. máls. Aðrar útgáfur af skjalinu: PDF - Word Perfect.
148. löggjafarþing 2017–2018.
Prentað upp.
Þingskjal 843 — 453. mál.
Áheyrnarfulltrúi.
2. umræða.
Nefndarálit
um frumvarp til laga um breytingu á lögum um Lífeyrissjóð starfsmanna ríkisins, nr. 1/1997, með síðari breytingum (hálfur lífeyrir).
Frá efnahags- og viðskiptanefnd.
Nefndin hefur fjallað um málið og fengið á sinn fund Önnu Valbjörgu Ólafsdóttur og Harald Steinþórsson frá fjármála- og efnahagsráðuneytinu. Nefndinni barst umsögn um málið frá Lífeyrissjóði starfsmanna ríkisins.
Í frumvarpinu eru lagðar til breytingar á lögum um Lífeyrissjóð starfsmanna ríkisins, nr. 1/1997, sem eru nauðsynlegar svo að sjóðfélagar í B-deild sjóðsins geti nýtt sér heimild til töku hálfs lífeyris frá 65 ára aldri, að ákveðnum skilyrðum uppfylltum, sem innleidd var í lög um almannatryggingar, nr. 100/2007, með lögum nr. 116/2016, sbr. 4. efnismgr. 2. gr. Breytingarnar sem lagðar eru til í frumvarpinu eru tvenns konar. Annars vegar er lagt til að ný málsgrein bætist við 24. gr. laga um Lífeyrissjóð starfsmanna ríkisins sem kveði á um að sjóðfélagi geti ákveðið að hefja töku hálfs ellilífeyris hvenær sem er eftir að 65 ára aldri er náð að því skilyrði uppfylltu að hann sé ekki í meira en hálfu starfi sem veitir aðild að sjóðnum eða hefði veitt rétt til aðildar að sjóðnum fyrir stofnun A-deildar hans. Hins vegar er lögð til sú breyting á 2. málsl. 2. mgr. 27. gr. laganna að hlutfall viðbótarréttinda við makalífeyri samkvæmt ákvæðinu miði við starfshlutfall sjóðfélaga þegar taka á hálfum ellilífeyri hófst þegar við á en ekki við starfslok.
Í umsögn LSR um málið kemur fram að lagabreytingin sem frumvarpið kveður á um sé nauðsynleg svo þeir 22.400 einstaklingar sem eigi réttindi í sjóðnum geti nýtt sér rétt til töku hálfs lífeyris frá 65 ára aldri. Sjóðurinn styðji því samþykkt frumvarpsins. Í umfjöllun nefndarinnar var þeirri spurningu velt upp hvort tryggt væri að hálft starfshlutfall á móti töku hálfs lífeyris veitti sjóðfélaga í B-deild LSR áframhaldandi ávinnslu í sjóðnum. Hefur nefndin fengið staðfest að svo sé og að 50% starfshlutfall sjóðfélaga í B-deild veiti 1% ávinnslu á ári en 100% starfshlutfall veitir 2% ávinnslu.
Nefndin leggur til að frumvarpið verði samþykkt óbreytt.
Ólafur Ísleifsson, áheyrnarfulltrúi í nefndinni, er samþykkur áliti þessu.
Alþingi, 24. apríl 2018.
Óli Björn Kárason, form. |
Ólafur Þór Gunnarsson, frsm. | Þorsteinn Víglundsson. |
Bryndís Haraldsdóttir. | Helgi Hrafn Gunnarsson. | Hildur Sverrisdóttir. |
Oddný G. Harðardóttir. | Sigmundur Davíð Gunnlaugsson. | Silja Dögg Gunnarsdóttir. |