Ferill 767. máls. Aðrar útgáfur af skjalinu: PDF - Word Perfect.
149. löggjafarþing 2018–2019.
Þingskjal 1527 — 767. mál.
2. umræða.
Nefndarálit með breytingartillögu
um frumvarp til laga um samtök um evrópska rannsóknarinnviði (ERIC).
Frá allsherjar- og menntamálanefnd.
Nefndin hefur fjallað um málið og fengið á sinn fund Jón Vilberg Guðjónsson, Ásdísi Jónsdóttur og Gísla Rúnar Pálmason frá mennta- og menningarmálaráðuneyti, Guðbjörgu Andreu Jónsdóttur frá Félagsvísindastofnun Háskóla Íslands, Ragnheiði Huldu Proppé frá félagsvísindasviði Háskóla Íslands, Guðrúnu Nordal frá Stofnun Árna Magnússonar í íslenskum fræðum, Sigurð Guðjónsson og Sóleyju Morthens frá Hafrannsóknastofnun – rannsókna- og ráðgjafarstofnun hafs og vatna, Trausta Baldursson frá Náttúrufræðistofnun Íslands og Hrafnhildi Valdimarsdóttur og Kristínu S. Vogfjörð frá Veðurstofu Íslands.
Nefndinni bárust umsagnir frá félagsvísindasviði Háskóla Íslands, Félagsvísindastofnun Háskóla Íslands, Hafrannsóknastofnun – rannsókna- og ráðgjafarstofnun hafs og vatna, Náttúrufræðistofnun Íslands, Stofnun Árna Magnússonar í íslenskum fræðum og Veðurstofu Íslands.
Tilefni og tilgangur frumvarpsins er að gera Íslandi kleift með innleiðingu reglugerðar ráðsins (EB) nr. 723/2009 frá 25. júní um lagaramma Bandalagsins um samtök um evrópska rannsóknarinnviði (ERIC) ásamt reglugerð ráðsins (ESB) nr. 1261/2013 frá 2. desember 2013 um breytingu á reglugerð (EB) nr. 732/2009 að gerast aðili að samtökum um evrópska rannsóknarinnviði. Með innleiðingu reglugerðanna opnast tækifæri fyrir íslenskt vísindasamfélag til að taka þátt í samstarfi um uppbyggingu og rekstur rannsóknarinnviða sem eru af þeirri stærðargráðu að ógerningur er fyrir einstök ríki að fjármagna slíka innviði sjálfstætt.
Samhljómur var á meðal gesta um mikilvægi þess að samþykkja frumvarpið og tryggja þátttöku og samstarf um evrópska rannsóknarinnviði. Samþykkt þess eykur m.a. möguleika íslensks vísindasamfélags á aðgangi að rannsóknarinnviðum og fjármagni úr samkeppnissjóðum. Nefndin tekur undir framangreint og áréttar jafnframt að fjárhagsleg áhrif snúa ekki einvörðungu að kostnaði af þátttöku Íslands í erlendum ERIC-samtökum heldur er einnig um að ræða jákvæð fjárhagsleg áhrif fyrir vísindasamfélagið. T.d. hefur þátttaka Íslands í rannsóknarverkefnum leitt til styrkveitinga sem eru hærri en kostnaður við þátttöku í slíku samstarfi. Þá er einnig um að ræða fagleg áhrif fyrir vísindasamfélagið.
Nefndin leggur til minni háttar orðalagsbreytingar á 1. og 5. gr. frumvarpsins.
Nefndin leggur til að frumvarpið verði samþykkt með eftirfarandi
BREYTINGU:
1. Í stað orðsins „heimila“ í 1. gr. komi: stuðla að.
2. Í stað orðanna „umsóknir Íslands að“ í 5. gr. komi: umsóknir um þátttöku Íslands í.
Páll Magnússon og Helgi Hrafn Gunnarsson voru fjarverandi við afgreiðslu málsins en skrifa undir álitið með heimild í 4. mgr. 18. gr. starfsreglna fyrir fastanefndir Alþingis.
Alþingi, 14. maí 2019.
Páll Magnússon, form. |
Hjálmar Bogi Hafliðason, frsm. | Andrés Ingi Jónsson. |
Anna Kolbrún Árnadóttir. | Birgir Ármannsson. | Guðmundur Andri Thorsson. |
Halla Gunnarsdóttir. | Helgi Hrafn Gunnarsson. | Jón Steindór Valdimarsson. |