 Grímur Thomsen Fæddur á Bessastöðum á Álftanesi 15. maí 1820, dáinn 27. nóvember 1896. Foreldrar: Þorgrímur Tómasson (fæddur 9. febrúar 1782, dáinn 26. júní 1849) alþingismaður og kona hans Ingibjörg Jónsdóttir (fædd 26. júlí 1784, dáin 15. júlí 1865) húsmóðir. Maki (16. júlí 1870): Jakobína Jónsdóttir (fædd 30. nóvember 1835, dáin 30. janúar 1919) húsmóðir. Foreldrar: Jón Þorsteinsson og kona hans Þuríður Hallgrímsdóttir. Sonur Gríms og Magdalene Thoresen: Axel Peter Jensen (1843). Stúdent úr heimaskóla hjá Árna biskupi Helgasyni 1837. Hóf nám í lögfræði við Hafnarháskóla, en lagði brátt stund á heimspeki og bókmenntir, varð mag. art. 1845, en sú nafnbót hækkuð í dr. phil. með konungsúrskurði 1854. Hlaut 1846 konungsstyrk til kynnisfarar um Evrópu og stóð sú ferð tvö ár. Í þjónustu utanríkismálaráðuneytisins danska 1848—1866, síðast skrifstofustjóri. Var meðal annars um skeið aðstoðarmaður sendiherra Dana í Brussel og Lundúnum. Bóndi á Bessastöðum á Álftanesi frá 1868 til æviloka. Yfirskoðunarmaður landsreikninganna 1878—1885. Átti sæti í skólamálanefndinni 1875—1877. Alþingismaður Rangæinga 1869—1874, alþingismaður Gullbringu- og Kjósarsýslu 1874—1880, alþingismaður Borgfirðinga 1880—1892. Forseti neðri deildar 1885. Varaforseti sameinaðs þings og neðri deildar 1879.
Ljóðskáld og ljóðaþýðandi, ljóðin hafa birst í mörgum útgáfum. Samdi merk rit og greinar um bókmenntir. Ritstjóri: Ísafold (1878—1879). |
