Guðjón S. Brjánsson

Guðjón S. Brjánsson
  • Embætti: Varaformaður þingflokks
  • Kjördæmi: Norðvesturkjördæmi
  • Þingflokkur: Samfylkingin

Þingseta

Alþingismaður Norðvesturkjördæmis síðan 2016 (Samfylkingin).

Æviágrip

Fæddur á Akureyri 22. mars 1955. Foreldrar: Brjánn Guðjónsson (fæddur 19. nóvember 1923, dáinn 22. júlí 2014) deildarstjóri hjá Kaupfélagi Eyfirðinga á Akureyri og Ragnheiður Hlíf Júlíusdóttir (fædd 10. júlí 1927, dáin 19. júlí 2013) húsfreyja og iðnverkakona. Maki: Dýrfinna Torfadóttir (fædd 10. júní 1955) gullsmiður og sjónfræðingur. Foreldrar: Torfi Tímóteus Björnsson og Sigríður Króknes. Synir Guðjóns og Lindu Ólafsdóttur Olsen: Brjánn (1982), Hallur (1987).

Stúdentspróf MA 1975. Próf í félagsráðgjöf frá Sosialhögskolen í Stafangri í Noregi 1979. Vélavarðanám við Framhaldsskóla Vestfjarða 1991. Námskeið til 30 tonna skipstjórnarréttinda á Ísafirði 1992. Próf í stjórnunarfræðum frá University of South Florida í Tampa, 1993. MPH frá Nordiska högskolan för folkhälsovetenskap í Gautaborg í lýðheilsufræði 2014.

Kennari við Gagnfræðaskólann í Stykkishólmi 1975–1976. Forstöðumaður Dalbæjar, heimilis aldraðra, á Dalvík 1979–1982, Múlabæjar, þjónustumiðstöðvar aldraðra og öryrkja, í Reykjavík 1982–1989 og Hlíðabæjar, dagdeildar fyrir alzheimersjúklinga, í Reykjavík 1985–1989. Dagskrárgerðarmaður hjá RÚV, hljóðvarpi í Reykjavík 1985–1988. Fréttamaður og dagskrárgerðarmaður (hlutastarf) hjá RÚV, hljóðvarpi á Ísafirði 1989–1992. Félagsmálastjóri Ísafjarðarbæjar 1989–1991. Rækjusjómaður og trillukarl á Ísafirði 1991–1992. Framkvæmdastjóri Heilbrigðisstofnunarinnar Ísafjarðarbæ 1993–2001, sjúkrahússins og heilsugæslustöðvarinnar á Akranesi frá 2001 og sameinaðrar Heilbrigðisstofnunar Vesturlands frá 2010.

Í stjórn og ritnefnd (útgáfustjórn) Félags stjórnenda í öldrunarþjónustu (FSÍÖ) 1981–1987. Fulltrúi Íslands í FSÍÖ á Norðurlöndum (NORDKOM) 1983–1985. Í stjórn og ritnefnd Félags áhugafólks um íþróttir aldraðra 1986–1990. Í félagsmálanefnd Ísafjarðarbæjar 1994–2001. Í stjórn Alþýðuflokksfélags Ísafjarðar og Jafnaðarmannafélags Ísafjarðarbæjar 1994–2001. Í stjórn Félags forstöðumanna sjúkrahúsa frá 1999, formaður frá 2013. Félagi í Oddfellow-stúku nr. 8, Agli á Akranesi, 2002. Í stjórn Norræna félagsins á Akranesi frá 2003. Í stjórn Símenntunarmiðstöðvar Vesturlands frá 2004, formaður 2005–2009. Í stjórn FAAS, nú Alzheimersamtakanna á Íslandi, frá 2011. Í stjórn/varastjórn Félags forstöðumanna ríkisstofnana frá 2014. Í varastjórn Starfsendurhæfingar Vesturlands frá stofnun 2014.

Alþingismaður Norðvesturkjördæmis síðan 2016 (Samfylkingin).

Allsherjar- og menntamálanefnd 2016–2017, velferðarnefnd 2017–.

Æviágripi síðast breytt 3. febrúar 2017.