Stimpilgjald við endurfjármögnun fasteignaveðlána.

Frú forseti. Ég er þeirrar skoðunar og Samfylkingin er þeirrar skoðunar að það eigi einfaldlega að afnema stimpilgjald af lánum. Við teljum að um mjög ósanngjarna skattlagningu á heimili og líka á minni fyrirtæki sé að ræða sem gerir þeim sem taka lán erfitt um vik að skuldbreyta lánum sínum.

Það eru miklar og jákvæðar hræringar á lánamarkaði sem gera það að verkum að það er auðveldara fyrir menn en áður að taka ný lán á lægri vöxtum og draga þannig úr þeirri byrði sem hvílir á fjölskyldum og fyrirtækjum. Stimpilgjöldin draga úr þessum möguleika. Þau draga úr samkeppni á lánamarkaði vegna þess að þau gera neytendum erfitt um vik að færa sig á milli. Ég er þeirrar skoðunar að þarna sé um ákaflega ósanngjarna skattheimtu að ræða og tel að það eigi að leggja hana af. Mér fannst raunar gæta ákveðins samkomulagsvilja hjá hæstv. fjármálaráðherra í málinu. Mér fannst eins og hann væri að fikra sig yfir á þá braut að hugsanlegt væri að ráðast í afnám þeirra á næstunni. Mér fannst a.m.k. að hann væri reiðubúinn til að ræða það alvarlega en ég tel að skattastefnan sem birtist í frumvarpi hæstv. fjármálaráðherra sé almennt röng. Ég tel að það hefði miklu frekar átt að fara þá leið að afnema stimpilgjöld og gera ráð fyrir því í efnahagsstefnu ríkisstjórnarinnar, og reyndar líka að lækka matarskattinn um helming en það er önnur saga, frú forseti, sem ég ætla ekki að segja núna.