Kjaramál kennara og skólastjórnenda í grunnskólum.
Kristján L. Möller (Sf) (andsvar):
Herra forseti. Það er ótrúlegt að hlusta á hæstv. ráðherra í ríkisstjórn Íslands tala um að ef samið verði við kennara muni það ógna þjóðarhag og efnahagsstefnan fara fjandans til.
Mig langar að spyrja hæstv. félagsmálaráðherra út í það að áður en hann settist á þing var hann sveitarstjórnarmaður í Hveragerði. Hann var jafnframt varaformaður Sambands íslenskra sveitarfélaga. Samband íslenskra sveitarfélaga hafði sig í frammi þá — hefur að vísu mikið til þagnað síðan — í baráttunni um það þegar Alþingi breytti lögum þannig að einkarekstur gat færst yfir í einkahlutfélög. Við það töpuðu sveitarfélögin miklum fjármunum.
Núverandi formaður Sambands íslenskra sveitarfélaga hefur nefnt töluna 1–1,4 milljarða kr. í þessu sambandi. Hæstv. félagsmálaráðherra hefur líka talað um þessa tölu. Þess vegna langar mig, virðulegi forseti, að spyrja hæstv. félagsmálaráðherra, ráðherra sveitarstjórnarmála: Hvað töpuðu sveitarfélögin miklu á þessari kerfisbreytingu og hvenær á að bæta þeim það?
