Meinatæknar og heilbrigðisþjónusta.

Herra forseti. Í frumvarpinu er atriði sem ég vildi fá hér nánari skýringar á hjá hæstv. ráðherra. Það segir hér í 1. gr. að aðeins megi veita þeim leyfi sem lokið hafi prófi í lífeindafræði frá háskóla hér á landi. Síðan segir í b-lið:

„Áður en leyfi er veitt samkvæmt þessari málsgrein skal leitað umsagnar Félags lífeindafræðinga og háskóla eða háskóladeildar sem menntar lífeindafræðinga.“

Ég hefði gjarnan viljað fá útlistun á því hvort hér er eingöngu verið að tala um að þetta heiti geti átt við þá sem menntast hér á landi. Eða á að skilja b-lið 1. gr. þannig að metið verði inn annað nám annars staðar frá, t.d. innan Evrópska efnahagssvæðisins?