Könnun á viðhorfi til álvers á Suðurlandi.
Gunnar Örlygsson (Fl):
Virðulegi forseti. Þann 4. apríl sl. var til umræðu á Alþingi Gallup-könnun á viðhorfi til álvers. Í máli hæstv. iðnaðarráðherra kom fram að fólk var spurt á þremur svæðum á Norðurlandi, þ.e. í Skagafirði, á Akureyri og Eyjafjarðarsvæðinu og Húsavík og Þingeyjarsýslu, um viðhorf sitt.
Það kom einnig fram í máli hæstv. ráðherra að könnun af þessu tagi kostaði lítilræði og í því skyni vil ég spyrja hæstv. ráðherra Valgerði Sverrisdóttur hvort hún muni beita sér fyrir því að sams konar kannanir um viðhorf almennings til álvers verði gerðar í Suðurkjördæmi.