Samkeppnislög.
Frsm. 2. minni hluta efh.- og viðskn. (Ögmundur Jónasson) (Vg) (andsvar):
Hæstv. forseti. Ég leyfi mér að vísa í álitsgerð lagaprófessorsins Stefáns Más Stefánssonar, sem segir m.a., með leyfi forseta:
„Varhugavert er að rökstyðja umrætt fullveldisframsal“ — sem hann fullyrðir að sé — „með því að það sé takmarkað við tilteknar aðstæður eins og gert er í fyrirliggjandi álitsgerð. Sé haldið áfram á þeirri braut má segja nákvæmlega það sama um flesta hluta EES-samningsins. Hann má greina í sundur í afmarkaða þætti og draga þannig smám saman vald frá íslenskum dómstólum.“
Hann er með mjög ákveðnar fullyrðingar og mjög eindregin varnaðarorð í okkar garð.
Ég efast ekki um vilja manna í nefndinni til að taka þessum ábendingum mjög alvarlega. Það var gert. Ég tel hins vegar að við séum að gera rangt með því að festa ákvæðið í lög og legg meira að segja mikla áherslu á það.