Ráðstöfun á söluandvirði Landssíma Íslands hf.

Hæstv. forseti. Ég fékk ekki mjög skýr svör varðandi arðgreiðslurnar. Ég held að þær hafi nefnilega verið þetta háar vegna þess að ríkisstjórnin ákvað að taka út arð, 4 milljarða kr., á síðasta ári, en arðgreiðslurnar hafi ekki verið svo miklar áður. Það eru kannski 6 milljarðar kr. í allt.

En af því að hv. þingmaður nefndi strandsiglingar og að það væri ríkisstjórninni að kenna að strandsiglingar voru lagðar af þá held ég að strandsiglingar hafi lagst af vegna breytinga í þjóðfélagsgerðinni. Fólk vill fá vörurnar strax og það er fljótlegra að flytja þær með bílum en með skipum hringinn í kringum landið og það hlýtur að vera ódýrara. Þetta er hagkvæmari kostur og þess vegna hefur hann orðið ofan á en það er ekki þannig að ríkisstjórnin hafi ákveðið að strandsiglingar yrðu lagðar af.