Bílaumferð og varpstöðvar.

Hæstv. forseti. Þetta er mál sem full ástæða er til að tala um og kannski ekki bara út af varplöndunum. Allir þingmenn hljóta að hafa tekið eftir því, þegar fuglarnir koma á vorin, hversu mikið af þeim verður fyrir bílum á þjóðvegum landsins. Mín skoðun er sú að þegar að hraði bíla er kominn yfir 90 km hefjist í raun fugladauðinn. Í langfæstum tilfellum lenda menn í að keyra á fugla ef þeir keyra undir löglegum hraðamörkum. Ég held að þetta sé hluti af því að menn komi sér upp umferðarmenningu sem ekki yrði til að menn slátri þessum gestum á vorin.

Ég legg til að reynt verði að skoða þetta og menn reyni að átta sig á hvaða hraði það er sem skiptir þarna máli. Í varplöndunum skiptir hraðinn auðvitað meira máli, en á vegunum sjálfum held ég að það skipti einnig máli að halda hraðanum við lögleg mörk í landinu.