Lenging fæðingarorlofs.

Hæstv. forseti. Ég vil lýsa ánægju minni með þessa góðu umræðu. Það er auðvitað ánægjulegt að hv. þingmenn skuli deila ánægju ríkisstjórnarinnar með þau góðu lög sem voru að hennar frumkvæði samþykkt í þinginu á sínum tíma um fæðingarorlof sem á sennilega ekki sinn líka í heiminum.

Að mínu frumkvæði fer nú fram norræn samanburðarrannsókn á mismunandi fæðingarorlofskerfum Norðurlandanna og ég er ekki í nokkrum vafa um að íslenska kerfið er í fremstu röð, ekki bara á Norðurlöndunum heldur í heiminum öllum. Það finn ég á viðbrögðum allra þeirra sem fá kynningu á kerfinu hvar sem maður kemur.

Ég vil sömuleiðis, hæstv. forseti, geta þess að málefni yngstu barnanna eru til sérstakrar skoðunar í fjölskyldunefnd forsætisráðherra. Verið er að skoða hvaða úrræði skuli standa til boða börnum sem eru á þeim aldri að fæðingarorlofs nýtur ekki lengur við og ekki er komið að því að þau fái inni á leikskólunum eins og rætt hefur verið hér.

Hv. þm. Jóhann Ársælsson minntist á nauðsyn þess að foreldrar hefðu tíma með börnum sínum, ekki bara meðan þau væru hvítvoðungar heldur líka á seinni skeiðum æskunnar og bernskunnar. Lögin um foreldraorlof kveða á um rétt foreldra til þess að taka orlof með börnum sínum til 8 ára aldurs en ég geri ráð fyrir því að í frumvarpi sem ég mun leggja fyrir þingið, um rétt langveikra barna og breytingar á lögunum um foreldraorlof, verði einmitt gerð tillaga um það að foreldraorlof gildi ekki einungis gagnvart börnum til 8 ára aldurs heldur til 18 ára aldurs. Þar erum við að stíga enn eitt skrefið í framfaraátt, þessi góða ríkisstjórn, hæstv. forseti.