Fjárlög 2006.
Frú forseti. Það er leitt hversu stuttur tími er hér til andsvara vegna þess að hv. þingmaður Einar Oddur Kristjánsson hafði greinilega miklu meira að segja en hann kom að á einni mínútu. (Gripið fram í.) Já, vonandi bætir hann úr því þegar hann heldur ræðu sína hér á eftir og þá getum við haldið áfram skoðanaskiptum.
Frú forseti. Það er ánægjulegt að hv. þingmaður Birkir J. Jónsson er aðstoðarmaður minn hér við tímatökuna. (Gripið fram í: Veitir ekki af.) En, frú forseti, það er eðlilegt að við gerum ráð fyrir að tekjur ríkissjóðs geti orðið mun meiri vegna þess að við sáum það á þessu ári með þeim gífurlega búhnykk sem skilaði sér í þensluástandinu sem nú er að ýmsir telja að það haldi áfram á næsta ári. Þetta er því auðvitað hluti af því, hv. þingmaður, sem ég nefndi að væri skortur á festu, það er áætlunargerðin. Hún er því miður í svo litlum tengslum við raunveruleikann og hv. þingmaður á að þekkja þetta býsna vel vegna þess að það er ekki bara það að tekjurnar standist ekki, þær eru yfirleitt áætlaðar of lágar, heldur er það líka það — sem er ekki síður alvarlegt — að útgjöldin standast aldrei og þau hækka og hækka og það er áhyggjuefni, hv. þingmaður.