Fjárlög 2006.
Virðulegur forseti. Það er hryggilegur vitnisburður um metnaðarleysi ríkisstjórnar Íslands í menntamálum að formaður fjárlaganefndar Alþingis lýsir því yfir úr þessum ræðustól að það sé bara býsna gott að vera undir meðaltali OECD-ríkjanna, að Háskóli Íslands rétt skríði upp yfir háskóla í Króatíu í fjárframlögum. Það ber vitni um metnaðarleysi og um skammsýni vegna þess að skortur á fjárfestingu í háskólamenntun og framhaldsmenntun fyrir hinar nýju kynslóðir veikir undirstöður atvinnulífs okkar til framtíðar, veikir okkur sem þekkingarsamfélag og veikir okkur í samkeppni þjóðanna. Ég hlýt að spyrja hv. þingmann hvort hann hafi engar áhyggjur af stöðu til að mynda ríkisháskólanna eins og Háskólans á Akureyri nú um stundir.