Þjónusta við börn og unglinga með geðraskanir.

Hæstv. forseti. Fyrir nokkrum dögum áttum við ágæta utandagskrárumræðu um málefni barna með geðraskanir og það úrræðaleysi sem foreldrar og börn standa frammi fyrir varðandi þjónustu fyrir þau. Það er á svo mörgum sviðum sem efla þarf þjónustuna og samþætta hana og þá sérstaklega nærþjónustuna sem er orðið mjög brýnt að efla, bæði í heilsugæslunni og í skólunum og svo sérfræðiþjónustuna.

Ég tel að þær skýrslur sem unnar hafa verið og þær nefndir sem hafa skilað af sér tillögum í gegnum árin séu þegar orðnar það ítarlegar og með það góðar ábendingar að það þurfi í raun og veru ekki annað að en að einhenda sér í að vinna samkvæmt tillögunum og leggja fjármagn í þennan málaflokk. En það þarf að hafa gott samstarf við sveitarfélögin, (Forseti hringir.) því að töluverður kostnaður mun koma á þau líka.