Lausafjárkaup, þjónustukaup og neytendakaup.
Herra forseti. Ég mæli í fjarveru iðnaðar- og viðskiptaráðherra fyrir frumvarpi til laga um breytingu á lögum um lausafjárkaup, lögum um þjónustukaup og lögum um neytendakaup, en því er ætlað að koma í stað bráðabirgðaákvæðis sama efnis í lögum nr. 50/2000, um lausafjárkaup, lögum nr. 42/2000, um þjónustukaup og lögum nr. 48/2003, um neytendakaup, en það féll úr gildi hinn 31. desember 2005.
Á Alþingi voru samþykkt árið 2000 annars vegar ný lög um lausafjárkaup og hins vegar um þjónustukaup. Vegna innleiðingar á tilskipun 1999/44/EB um tiltekna þætti í sölu neysluvara og ábyrgð þar að lútandi reyndist nauðsynlegt að setja hér á landi sérstök lög sem gilda um lausafjárkaup þegar annar aðili að viðskiptunum er neytandi, sbr. lög nr. 48/2003, um neytendakaup. Við þinglega meðferð framangreindra mála og að tillögu efnahags- og viðskiptanefndar Alþingis var ákveðið að setja inn ákvæði til bráðabirgða þar sem kveðið væri á um að viðskiptaráðherra skyldi skipa til fimm ára kærunefnd lausafjár- og þjónustukaupa. Í samræmi við ákvæði laganna nær starfsheimild framangreindrar nefndar aðeins til ársins 2005 og því er nauðsynlegt nú að tryggja með lagabreytingu eins og hér er gert áframhaldandi starfsemi þessarar kærunefndar. Á þeim fimm árum sem nefndin hefur starfað hefur hún fengið um eða yfir tuttugu mál til umfjöllunar og fellt alls þrettán úrskurði. Lagaúrræði þar sem unnt er að fara með ágreiningsmál fyrir kærunefnd með þeim hætti sem kveðið er á um í framangreindum lögum er bæði skjótvirk og ódýr leið til að leita úrlausnar á lögfræðilegum deilum í tengslum við þau viðskipti sem fjallað er um í framangreindum lögum. Reynslan af starfsemi nefndarinnar þau fimm ár sem hún hefur starfað að úrlausn slíkra ágreiningsmála sem hafa komið upp í viðskiptum hefur verið góð og er hér því lagt til að þetta réttarúrræði verði framlengt og verði eðlilegur þáttur í þeim þremur lagabálkum sem hingað til hafa boðið upp á þetta úrræði.
Nefndin hefur auk þess á undanförnum fimm árum verið vistuð hjá viðskiptaráðuneytinu. Á árinu 2005 voru hins vegar samþykkt ný lög um Neytendastofu og talsmann neytenda. Það er talið eðlilegt í framhaldi af þessari breytingu að nefndin verði framvegis vistuð hjá Neytendastofu en ekki ráðuneytinu. Í frumvarpinu er að finna það nýmæli að framvegis verði móttaka erinda sem beint er til nefndarinnar og vistun gagna nefndarinnar hjá Neytendastofu en að öðru leyti er öll efnisleg meðferð mála og á ábyrgð hjá kærunefndinni.
Samkvæmt frumvarpinu er gert ráð fyrir, eins og áður hefur verið, að viðskiptaráðherra skipi formann kærunefndarinnar án tilnefningar og skal formaðurinn fullnægja skilyrðum til að vera héraðsdómari. Hina tvo fulltrúana skipar ráðherra annars vegar eftir tilnefningu Neytendasamtakanna og hins vegar eftir tilnefningu Samtaka atvinnulífsins. Ákvæði frumvarpsins eru annars efnislega óbreytt frá þeim ákvæðum til bráðabirgða sem nú er að finna í framangreindum tveimur lagabálkum.
Ég vil síðan leggja til, herra forseti, að að lokinni þessari umræðu verði frumvarpinu vísað til 2. umr. og hv. efnahags- og viðskiptanefndar til umfjöllunar.