132. löggjafarþing — 122. fundur,  3. júní 2006.

Flugmálastjórn Íslands.

707. mál
[12:49]
Hlusta

Frsm. meiri hluta samgn. (Guðmundur Hallvarðsson) (S):

Virðulegi forseti. Ég mæli fyrir nefndaráliti um frumvarp til laga um Flugmálastjórn Íslands og nefndaráliti um frumvarp til laga um stofnun hlutafélags um flugleiðsöguþjónustu og flugvallarekstur Flugmálastjórnar Íslands. Þetta er frá meiri hluta samgöngunefndar.

Í báðum þessum málum fékk nefndin fjölda aðila á sinn fund auk þess sem nokkrar umsagnir bárust.

Fyrst varðandi málið um Flugmálastjórn Íslands. Í frumvarpinu er lagt til að skipulagi flugmála hér á landi verði breytt. Skilið verði á milli þjónustu og reksturs annars vegar og stjórnsýslu og eftirlits hins vegar til samræmis við alþjóðlega þróun á þessu sviði, m.a. annars staðar á Norðurlöndum. Sérstök lög verði sett um Flugmálastjórn Íslands sem komi í stað núgildandi II. kafla laga um loftferðir, nr. 60/1998. Markmið frumvarpsins er að styrkja Flugmálastjórn í breyttu umhverfi og skilgreina betur hlutverk og starfsemi stofnunarinnar en gert er í núgildandi loftferðalögum. Frumvarpið gerir ráð fyrir breytingum í starfsemi Flugmálastjórnar Íslands sem fela m.a. í sér að verkefni Flugmálastjórnar verði á sviði stjórnsýslu loftferða en önnur verkefni flytjist til hlutafélags. Verkefni Flugmálastjórnar Íslands verður því að fara með stjórnsýslu á sviði loftferða, hafa eftirlit með loftferðastarfsemi og stuðla að öryggi í flugi.

Meiri hlutinn leggur til að frumvarpið verði samþykkt óbreytt.

Svo er það nefndarálit um stofnun hlutafélags um flugleiðsöguþjónustu og flugvallarekstur Flugmálastjórnar Íslands. Í frumvarpinu er lagt til að ríkisstjórninni verði heimilað að stofna hlutafélag um þjónustuverkefni Flugmálastjórnar Íslands, þ.e. svokallaða flugleiðsöguþjónustu, þar með talda flugumferðarþjónustu, fjarskipta- og leiðsögukerfi, svo og flugvallarekstur Flugmálastjórnar. Gert er ráð fyrir að félagið taki yfir þær eignir, réttindi, skuldir og skuldbindingar sem tilheyra flugleiðsöguþjónustu og flugvallarekstri Flugmálastjórnar.

Á fundi nefndarinnar kom fram að við undirbúning frumvarpsins hefði verið leitað eftir athugasemdum frá hagsmunaaðilum, flugrekendum og stéttarfélögum, ásamt Flugmálastjórn. Haldnir hefðu verið nokkrir fundir með starfsmönnum, stéttarfélögum og fulltrúum lífeyrissjóða starfsmanna ríkisins þar sem málið hefði verið kynnt. Þá hefur flugráð fjallað um málið á öllum stigum þess og tekið það fyrir í ráðinu.

Breytingarnar sem frumvarpið gerir ráð fyrir hafa því verið afar vel kynntar og kallað hefur verið eftir sjónarmiðum ólíkra aðila sem málið varðar.

Meiri hlutinn leggur áherslu á að hlutafélagaformið henti vel nú því að fyrir liggur að flugstjórnarmiðstöðvar beggja vegna Atlantshafsins munu sækjast eftir að taka yfir flugumferðarstjórn á Norður-Atlantshafi sem sinnt hefur verið frá Íslandi. Mikilvægt er að unnt sé að veita sem besta flugumferðarþjónustu hér á landi sem sé samkeppnishæf og hafi öryggi að leiðarljósi. Að öðrum kosti kann að vera hætta á að alþjóðaflugþjónustan hverfi úr landi. Um leið mundu tapast mörg störf íslenskra flugumferðarstjóra.

Meiri hlutinn leggur til eina breytingu á frumvarpinu. Ekki er um efnisbreytingu að ræða heldur orðalagsbreytingu.

Meiri hlutinn leggur til að frumvarpið verði samþykkt með svofelldri breytingu:

Síðari málsliður 1. mgr. 3. gr. orðist svo: Jafnframt er ráðherra heimilt að ákveða að félagið yfirtaki réttindi, skuldir og skuldbindingar vegna flugleiðsöguþjónustu og flugvallarekstrar við stofnun þess.

Undir bæði þessi nefndarálit rita eftirtaldir aðilar: Sá er hér stendur, Guðmundur Hallvarðsson, Hjálmar Árnason. Guðjón Hjörleifsson. Sigurrós Þorgrímsdóttir og Guðjón Ólafur Jónsson.

Virðulegi forseti. Að lokinni þessari umræðu legg ég til að málinu verði vísað til 3. umr.