fjárlög 2007.

Hæstv. forseti. Það var sagt úr ræðustóli rétt áðan að stjórnarandstaðan hefði brugðist hart við. Nú get ég ekki tekið að mér, hæstv. forseti, að svara fyrir alla stjórnarandstöðuna varðandi viðbrögðin í vor. Ég get þar af leiðandi ekki borið um það nákvæmlega hvernig stjórnarandstaðan í heild brást við. Ég veit hvernig við í Frjálslynda flokknum brugðumst við. Við töldum að það væri óráð að fara í þessa frestun framkvæmda á landsvæðum þar sem þörfin væri hvað mest fyrir að halda áfram vegaframkvæmdum, þar sem lægi á að komast upp úr drullunni, þar sem lægi á að gera vegina akfæra, ekki bara yfir hásumartímann heldur einnig vor og haust — sem þeir eru iðulega ekki.

Við í Frjálslynda flokknum töldum að það hefði átt að bregðast við með því að beina þessum aðgerðum sérstaklega að þeim svæðum þar sem þenslan var og bentum á það. Það er því rangt, hv. þm. Birkir Jón Jónsson, að við í Frjálslynda flokknum höfum lagst alfarið gegn öllum aðgerðum í þessa veru. Það er rangt. Við bentum hins vegar á að það væri ekki rétt að snúa virku aðgerðunum beint að svæðum þar sem engin þensla er mælanleg — um það vitna ályktanir íbúasamtaka, bæjarstjórna og bæjarstjóra, landshlutasamtaka, fólks úr öllum stjórnmálaflokkum, hv. þingmenn, fólks úr öllum stjórnmálaflokkum. Það vöruðu allir við því hvað þetta þýddi við ákveðnar aðstæður.