dýralæknar og heilbrigðisþjónusta við dýr.

Hæstv. forseti. Ég þakka hæstv. ráðherra fyrir svörin. Ég las ekki upp fyrirspurnirnar lið fyrir lið en ég þakka honum þau svör sem snúa að fyrirhuguðum breytingum vegna EES-samningsins og hugsanlega endurskoðun á lögum um dýralækna og heilbrigðisþjónustu.

Hvað varðar niðurstöðu hæstv. ráðherra um stöðu héraðsdýralækna á Fljótsdalshéraði þá er ég honum ósammála. Ég veit að bændur og þeir sem þurfa á þjónustunni að halda eru ósammála honum líka. Það er talað um tvo héraðsdýralækna. Þeir eru tveir en annar er í hálfu starfi og mikið álag á þeim, sérstaklega þeim sem er þar í fullu starfi. Það er ekki hægt að líkja saman embættum héraðsdýralækna í svo víðfeðmu héraði sem Fljótsdalshéraði er og svæðinu sem héraðsdýralæknar á norðaustursvæðinu eiga að sinna. Það er ekki aðstaða eða nokkur einasti rekstrargrundvöllur fyrir sjálfstætt starfandi dýralækna í hinum dreifðu sveitum Það er einkum í þéttbýli, þar sem gæludýrin eru. Þess vegna verður að horfa til þess að héraðsdýralæknar sinni einnig almennum dýralæknisstörfum eins og þeir hafa gert.

Eigi að breyta og skilja algjörlega á milli eftirlitsstarfa og dýralæknisstarfa er það augljóst í mínum huga að þá verður að ráða fleiri opinbera dýralækna (Forseti hringir.) til að sinna þessum störfum. Það er ekki rekstrargrundvöllur (Forseti hringir.) fyrir sjálfstætt starfandi dýralækna á svæðinu.