afbrigði um dagskrármál.
Frú forseti. Hér er verið að leggja það fyrir þingið að veita afbrigði fyrir hinum svokallaða matarskatti. Hér er um að ræða mál sem hæstv. ríkisstjórn kynnti strax í upphafi þings að hún hygðist leggja fram. Síðan hefur hún haft allmargar vikur til að færa það í þingtækan búning. Það hefur hins vegar ekki tekist fyrr en í gær þegar þetta mál var lagt fram á útbýtingarfundi. Tilskilinn frestur er ekki liðinn til þess að hægt sé að taka þetta mál á dagskrá. Það er því ekki hægt að ræða þetta mál nema til komi atbeini stjórnarandstöðunnar.
Við höfum lýst því yfir í stjórnarandstöðunni að við erum reiðubúin til þess að rétta fram hönd sátta til þess að hægt verði að ljúka þinghaldi hér á skikkanlegum tíma, og til að undirstrika þann sáttavilja munum við í Samfylkingunni og fleiri í stjórnarandstöðunni greiða því atkvæði okkar að þetta mál verði tekið á dagskrá hér á eftir. Með því undirstrikum við í fyrsta lagi það sem við höfum áður sagt að í þessu máli er margt jákvætt en í öðru lagi undirstrikum við vilja okkar til að ná samstöðu með ríkisstjórninni um að hægt verði að ljúka hér þinghaldi á skikkanlegum tíma. Þessi afstaða okkar er því til staðfestingar.