svar við fyrirspurn um fjárhagsstöðu RÚV.

Hæstv. forseti. Þetta eru auðvitað mjög alvarlegar upplýsingar sem hér koma fram og ég undrast það svolítið að hæstv. menntamálaráðherra skuli ekki gefa nokkur einustu svör við því hvað er hér á ferðinni í þeirri umræðu sem nú fer fram.

Hvað gerir það að verkum að 420 millj. safnast í skuld á fyrstu sex mánuðum síðastliðins árs? Veit hæstv. menntamálaráðherra ekkert um það? Hvaða verkkaup, samningar eða skuldbindingar hafa farið fram í rekstri Ríkisútvarpsins sem gera það að verkum að skuldirnar hlaðast upp með þessum hætti á árinu? Hefur hæstv. menntamálaráðherra engar áhyggjur af því? Er engin ástæða til að gefa þinginu eina einustu skýringu á því hvað liggur að baki 420 millj. kr. skuldar á fyrstu sex mánuðum síðastliðins árs?

Ég hefði talið að það væri svolítill sómi að því fyrir hæstv. menntamálaráðherra að gefa smáupplýsingar um það hvað stendur þarna á bak við. Það getur varla verið að slíkt gerist án þess að menntamálaráðherra hafi um það nokkra einustu vitneskju. Það væri stórundarlegt ef svo væri.

Ég skora á hæstv. ráðherra að gefa einhverjar upplýsingar um þetta. Hæstv. ráðherra hlýtur að vita hvað er hér á ferðinni? Af hverju stafar það? Hvað er verið að gera? Hvað hefur nýr útvarpsstjóri verið að aðhafast?