stuðningur Íslendinga við hernaðaraðgerðir Bandaríkjamanna.
Herra forseti. Stuðningur ríkisstjórnar Framsóknarflokksins og Sjálfstæðisflokksins við innrásina í Írak er einn daprasti atburðurinn í sögu íslenska lýðveldisins. Enn hafa forustumenn þessara flokka ekki beðið íslensku þjóðina afsökunar né heldur dregið þann stuðning til baka, eins og kom rækilega fram í máli forsætisráðherra áðan.
En daprara er þó að forsætisráðherra skuli segja að ekki sé búið að taka afstöðu til þess, komi beiðni um stuðning við innrásina í Íran verði hún gerð. Mér finnst, herra forseti, að forsætisráðherra og ríkisstjórnin ættu í fyrsta lagi að biðjast afsökunar á stuðningi sínum við innrásina í Írak sem var hrapalleg.
Í öðru lagi ætti ráðherra að taka fram að ekki komi til greina að styðja Bandaríkjamenn eða nokkra aðra til innrásar í annað land, hvort sem er í Íran eða önnur lönd. (Forseti hringir.) Sú yfirlýsing ætti að vera á hreinu. En í stað þess fáum við (Forseti hringir.) svona loðin orð og undanbrögð eins og hæstv. forsætisráðherra hafði í frammi.