orð þingmanns um meðferðarstofnanir.

Frú forseti. Hér áðan vorum við að ræða um stöðu fíkniefnavandamála og starf SÁÁ og ég leyfði mér að geta um ákveðinn galla sem mér finnst vera í stjórnskipun þeirrar stofnunar og því miður varð mér á að bera það saman við Byrgið sem ekki má víst gera. Hafi ég meitt einhvern vil ég endilega biðjast afsökunar á því, enda tel ég mig hafa gert það í ræðu minni um leið og ég varð var við hvað þingmenn voru hneykslaðir. Ég vil taka á mig þá sök hafi ég gert eitthvað rangt í þessu en ég var eingöngu að bera saman það stjórnskipulag sem er hjá SÁÁ sem mér finnst ekki vera nægilega gott.

Svo vil ég benda á að ekki er búið að sanna sök á neinn hjá Byrginu þannig að menn geta í rauninni ekki sagt að það sé eitthvað saknæmt þar. Ég var eingöngu að benda á að stjórnskipulagið hjá SÁÁ mætti vera betra og það þyrfti að gera við þá samninga. Það frumvarp sem ég hef lagt fram um breytingu á fjárreiðulögum gengur einmitt út á það að ekki megi greiða út fé úr ríkissjóði nema gerður hafi verið samningur.