aðgerðir til að bæta kjör aldraðra og öryrkja.

Herra forseti. Ég kveð mér hljóðs undir liðnum um störf þingsins til að spyrjast fyrir um svar ríkisendurskoðanda við tilmælum og beiðni þingflokks Vinstri hreyfingarinnar – græns framboðs frá 22. ágúst sl. um mat á lögmæti þessa gernings hér sem er samkomulag íslenska ríkisins og Landsvirkjunar um yfirtöku vatnsréttinda í neðri hluta Þjórsár. Hvar er það?

Ég átti satt best að segja, herra forseti, von á því að svar ríkisendurskoðanda mundi bíða okkar þingmanna hér þegar við kæmum til starfa á þessum morgni, og jafnvel að þingmenn eða a.m.k. þingflokksformaður þingflokks vinstri grænna fengi það fyrst í hendur eðli máls samkvæmt.

En nei, herra forseti, þrátt fyrir yfirlýsingu forseta hér í gær bólar ekkert á þessu svari. Þess í stað liggur á borðum þingmanna áróðursplagg frá þróunarfélaginu á Keflavíkurflugvelli. Það kemur vel á vondan, finnst mér, í ljósi þeirrar umræðu sem fram hefur farið um einmitt það efni og er til umfjöllunar á eftir.

Við þingmenn Vinstri hreyfingarinnar – græns framboðs höfum gert mjög alvarlegar athugasemdir við þennan gjörning og bent á að hann stenst ekki 40. gr. stjórnarskrárinnar og heldur ekki 29. og 36. gr. fjárreiðulaga. Við óskuðum eftir áliti ríkisendurskoðanda á þessum gjörningi og, herra forseti, nú eru liðnar sléttar 15 vikur síðan það erindi fór í gegnum forsætisnefnd þingsins. Það er ítrekað búið að kalla eftir þessu og þrátt fyrir yfirlýsingu forseta úr forsetastól í gær um að þetta kæmi í dag bólar ekkert á þessu (Forseti hringir.) plaggi. Ég hlýt að spyrja. Hvar er svarið?