flug milli Vestmannaeyja og lands.
Hæstv. forseti. Spurningin sem hér er lögð fram af hv. þm. Árna Johnsen um flug milli Vestmannaeyja og lands hljóðar svo:
„Eru mörg dæmi um að Flugfélag Vestmannaeyja hafi flogið á milli lands og Eyja á sl. sex mánuðum þegar Flugfélag Íslands hefur ekki flogið?“
Samkvæmt þeim upplýsingum sem við höfum fengið frá flugvalla- og leiðsögusviði Flugstoða ohf. er niðurstaðan þessi: 3. október 2007 fór Flugfélag Vestmannaeyja eina ferð en komst ekki til baka vegna þoku. 5. nóvember 2007 fór Flugfélag Vestmannaeyja tvær ferðir.
Með öðrum orðum, það voru þrjár ferðir á þessu tímabili sem Flugfélag Vestmannaeyja flaug en ekki Flugfélag Íslands. Rétt er að geta þess að fleiri dæmi eru um að Flugfélag Íslands hafi flogið á þessu tímabili en Flugfélag Vestmannaeyja ekki. Á tímabilinu hefur Flugfélag Vestmannaeyja farið 3.279 ferðir og Flugfélag Íslands 303 ferðir. Í báðum tilfellum er átt við ferðir fram og til baka.
