rannsóknir og sjálfbær nýting jarðhitasvæða.

Herra forseti. Það er ljóst að jarðhitanýtingin hér frá upphafi og alveg fram til þessa dags hefur að mestu leyti verið þannig að ekki hefur verið gengið óhóflega á þessi svæði öðruvísi en þannig að þau gætu þá jafnað sig aftur. Ég nefni Mosfellsbæ og ég nefni Laugarnesið. Þar lærðu menn af reynslunni og fara í þrepanýtingu, auka þetta skref fyrir skref til þess, eins og ráðherra nefndi hér, að fá tíföldun út úr svæðinu eins og gerist í Laugarnesinu.

Mig langar að spyrja hæstv. ráðherra hvort hann telji verjanlegt að fórna einu eða tveimur af þessum dýrmætu háhitasvæðum okkar til tilrauna í því hversu langt megi ganga. Það er alveg ljóst að bæði Landsvirkjun, sem er fyrir norðan og í Kröflu með jarðvarmavirkjun, Hitaveita Suðurnesja og Orkuveita Reykjavíkur fram til þessa tíma hafa kappkostað að ganga ekki of nærri svæðunum. Nú allt í einu hafa þeir séð ljósið: Keyrum þau í botn, blóðmjólkum þau og lokum þeim svo smástund. Og eins og þarna var vitnað til: Við eigum svo mörg háhitasvæði, er ekki allt í lagi að prófa eitt? Mig langar til þess að vita hver afstaða ráðherrans er til þessa viðhorfs.