störf þingsins.

Hæstv. forseti. Ég kveð mér hljóðs til að taka undir með hv. þm. Valgerði Bjarnadóttur og fagna því frumkvæði sem hún hefur tekið með því að stíga afdráttarlaus skref í þá átt að afnuminn verði sérréttindabálkurinn sem kveður á um sérkjör alþingismanna, ráðherra og æðstu embættismanna í lífeyrismálum. Í landinu eru skýr lög og reglur um hvernig haga skuli lífeyrisréttindum þeirra sem starfa hjá ríkinu. Lífeyrissjóður starfsmanna ríkisins er alþingismönnum opinn. Ég spyr: Hvað er það sem dvelur orminn langa? Hvers vegna er þessu máli ekki hraðað í gegnum þingið? Svo var að skilja á hv. formanni allsherjarnefndar að hér væri á ferðinni geysilega flókið mál. Þetta er mjög einfalt mál. Alþingismenn þekkja málið í þaula. Spurningin er: Vilja menn að alþingismenn og ráðherrar og æðstu embættismenn búi við sérkjör, sérforréttindi í lífeyrismálum? Eða eiga þeir að taka lífeyrisréttindi eins og aðrir sem fá laun frá ríkinu? Ég er því fylgjandi og ég styð það mjög eindregið að þessu máli verði hraðað í gegnum þingið. Þetta er mjög einfalt mál.