öryggismál í Flugstöð Leifs Eiríkssonar.
Hæstv. forseti. Þessari fyrirspurn hefði auðvitað átt að beina til hæstv. dómsmálaráðherra sem fer með þessi mál. Ég get hins vegar sagt að ég veit að þetta mál er í eðlilegum farvegi milli dóms- og fjármálaráðuneytisins. Ég get ekki sagt mikið meira um þetta vegna þess að sá þáttur er ekki á forræði samgönguráðuneytisins.
Hins vegar get ég upplýst það vegna þess að það er mjög ánægjulegt, að á morgun mun ég mæla fyrir frumvarpi um breytingu á Keflavíkurflugvelli, um að stofna opinbert hlutafélag utan um þann rekstur og í dag kl. 5 mun ég fara suður í Keflavík til að ræða við starfsfólkið þar og kynna því þær breytingar sem boðaðar eru í frumvarpinu og eiga fund með því. Vafalaust mun starfsfólkið m.a. ræða þessi mál þá.
Ég ítreka að ég veit að þetta er í eðlilegum farvegi milli dóms- og fjármálaráðuneytisins.