framganga lögreglu gagnvart mótmælendum.

Virðulegur forseti. Nokkuð hefur borið á mótmælaaðgerðum undanfarna daga hjá bílstjórum eins og alþjóð er kunnugt og framganga lögreglunnar í þeim efnum hefur mér þótt vera til fyrirmyndar. Hún hefur við þessar erfiðu aðstæður sýnt festu en um leið þá hófsemi og það umburðarlyndi sem nauðsynlegt er að sýna gagnvart mótmælaaðgerðum í lýðræðissamfélagi eins og okkar — hún á hrós skilið, og hæstv. dómsmálaráðherra, fyrir framkvæmd löggæslunnar í þessu efni.

Við höfum því miður ekki alltaf borið gæfu til að sýna mótmælendum slíkt umburðarlyndi í aðgerðum þeirra. Er skemmst að minnast framgöngu gagnvart mótmælendum í umhverfismálum á síðasta ári. Á Snorrabrautinni í Reykjavík voru þá nokkrir einstaklingar að mótmæla og voru umsvifalaust handteknir og kærðir fyrir framferði sitt. Var mótmælendum, bæði þar og fyrir austan, sannarlega sýnd fyllsta harka.

Það er ánægjulegt að mótmælendum sé sýnt umburðarlyndi í lýðræðissamfélagi eins og okkar. Ég vil spyrja hæstv. dómsmálaráðherra hvort hann hafi beitt sér fyrir mildari framgöngu og túlkun á lögum og löggæslu gagnvart mótmælaaðgerðum í lýðræðissamfélagi — hvort hér sé orðin stefnubreyting og hvort við megum treysta því að framvegis verði mótmælendum sýnt það nauðsynlega umburðarlyndi sem þarf að vera í samfélagi eins og okkar og svo almennt um skoðun hans á þróun mála í þessum efnum.