afbrigði um lengd þingfundar.

Hæstv. forseti. Það var athyglisverð ræða sem hv. þm. Ragnheiður Ríkharðsdóttir beindi til okkar stjórnarandstæðinga. Staðreyndin er sú að fluttar voru málefnalegar ræður um leikskólastigið og grunnskólastigið í gær og fram á nótt. Ef stjórnarliðunum finnst að við séum að eyða of (Gripið fram í.) löngum tíma að eyða heilum degi í að fjalla um allt leikskólastigið og allt grunnskólastigið þá finnst mér það mjög skrýtið gildismat hjá stjórnarliðum.

Að koma svo hingað upp og fella palladóma yfir ræðum okkar stjórnarandstæðinga finnst mér í besta falli broslegt því að ræður okkar í gær voru málefnalegar um mjög mikilvæg mál. Við stjórnarandstæðingar erum að reyna að knýja það í gegn að þau mál fái efnislega umfjöllun, ítarlega og vandlega, en því miður virðast stjórnarliðar ætla að beita meiri hluta sínum á þingi (Forseti hringir.) til þess að koma í veg fyrir það.