skýrsla forsætisráðherra um efnahagsmál og aðkomu Alþjóðagjaldeyrissjóðsins.
Virðulegi forseti. Ég veit ekki hvort mér tekst að útskýra þetta eitthvað betur. Við munum senda frá Íslandi skjal sem kallað er „Letter of Intent“, væntanlega á morgun. Það skjal er yfirlýsing um hvað við ætlum að gera á næstunni og lýsing á aðstæðum hér heima. (GÁ: Láttu okkur heyra það hérna.) Það skjal mun verða birt (GÁ: Leyfðu okkur heyra það fyrst.) við fyrsta mögulega tækifæri. Það sagði ég strax í upphafi en auðvitað verðum við að fara að þeim lögmálum sem gilda hjá sjóðnum um þetta. Það skjal mun verða birt. Það er okkar yfirlýsing um þetta og á þeirri forsendu hyggst sjóðurinn taka þátt í þessu með okkur, leggja okkur lið en leggja ekki steina í okkar götu og jafnframt veita okkur þá lánafyrirgreiðslu sem rætt hefur verið um.