skýrsla forsætisráðherra um efnahagsmál og aðkomu Alþjóðagjaldeyrissjóðsins.
Virðulegi forseti. Ég sagði áðan að fyrir lægi áætlun stjórnvalda um hvernig þau ætla að vinna sig út úr þeim efnahagsörðugleikum sem við er að etja. Sú áætlun er á leiðinni til Alþjóðagjaldeyrissjóðsins og verður send á morgun. Það hefur komið fram í umræðu af hálfu hæstv. forsætisráðherra og það er sú áætlun sem hér um ræðir.
Í annan stað hefur einnig komið fram að meginefni þessarar áætlunar er lántaka hjá Alþjóðagjaldeyrissjóðnum. Á vordögum var samþykkt mjög rík heimild af hálfu Alþingis til stjórnvalda um lántöku og ég gef mér að þessi lántaka rúmist innan þeirrar heimildar. Á hinn bóginn; ef eitthvað í þessum samningi kallar á frekari aðkomu Alþingis gef ég mér að það verði leitað eftir staðfestingu Alþingis á því þegar og ef samningur milli ríkisstjórnarinnar (Forseti hringir.) og Alþjóðagjaldeyrissjóðsins kemst á.