atvinnuleysistryggingar og Ábyrgðasjóður launa.
Frú forseti. Ég kýs að nýta mér rétt til andsvara af því að ég hreinlega gleymdi því áðan að spyrja hæstv. ráðherra um þann mismun sem er gerður í frumvarpinu annars vegar hvað varðar Ábyrgðarsjóð launa og hins vegar hvað varðar lögin um atvinnuleysistryggingar.
Það segir í 1. gr. að ákvæði 1. og 2. mgr. séu bundin því skilyrði að hinn tryggði hafi misst starf sitt að hluta vegna samdráttar í starfsemi vinnuveitanda, en í lokamálsgreininni í 2. gr. segir að ákvæði hvað varðar Ábyrgðarsjóð launa gildi: „um kröfur launamanna sem minnka starfshlutfall sitt á tímabilinu 1. október 2008 til og með 31. desember 2009 að kröfu vinnuveitanda“ — að kröfu vinnuveitanda — „vegna samdráttar í starfsemi vinnuveitanda sem rekja má til sérstakra aðstæðna á vinnumarkaði.“
Hvernig hefur hæstv. ráðherra hugsað sér sönnunarbyrðina í þessu efni? Er ekki hætt við að hún geti orðið mönnum erfið þegar komið er inn í gjaldþrotið?