réttarstaða fólks við uppsagnir.
Herra forseti. Ég held að hv. þingmaður verði nú að reyna að fara rétt með staðreyndir máls. Ég hef ekki vitað til þess að neins staðar sé boðaður 10% flatur niðurskurður í heilbrigðiskerfinu. Það hefur ekki verið fallist á það í ríkisstjórn eða samþykkt þar. Ég get fullvissað hv. þingmann um að ekki verður farið í neinn 10% flatan niðurskurð í velferðarkerfinu, (ÖJ: Það er byrjað.) það er bara staðreynd málsins. Við skulum sjá hvað setur þegar fjárlögin koma fram, það verður ekki farið í 10% flatan niðurskurð í heilbrigðiskerfinu. (Gripið fram í.)
Ég vil fá að svara hv. þingmanni áfram ef ég kemst að. Það verður auðvitað staðinn vörður um réttindi starfsfólks, að það verði ekki hlunnfarið á einn eða annan hátt, það verði ekki gengið á þau réttindi sem eru tryggð og eiga að vera til staðar. Ég fullvissa hv. þingmann um það og ef það eru einhver brögð að öðru verður auðvitað tekið á því. Það er grundvallaratriði í þessum samningum að ekki sé gengið á réttindi fólks, að það sé tryggt og staðinn vörður um það. Ég fullvissa hv. þingmann um að líka eru á leiðinni (Forseti hringir.) öflugar aðgerðir fyrir fyrirtækin í landinu og enn frekari aðgerðir til að tryggja betur hag heimilanna.