innheimtuaðgerðir vegna afnotagjalda RÚV.
Virðulegi forseti. Ég þakka hv. þingmanni fyrirspurnina og bara svo því sé svarað hreint og beint var mér ekki kunnugt um að til stæði núna að fara í einhverjar sérstakar innheimtuaðgerðir sökum vangoldinna afnotagjalda en ég mun afla mér upplýsinga. Hv. þingmaður spyr einnig um það hvernig að því verði staðið, ég mun kynna mér það líka í ljósi þessara umræðna.
Ég tel eðlilegt að ríkisstofnanir, að sjálfsögðu, gangi mildilega fram núna í öllum innheimtuaðgerðum. Það á að sjálfsögðu við um Ríkisútvarpið eins og aðrar ríkisstofnanir. Ég mun skoða þetta mál og kanna hvort gengið sé hart fram í þessum efnum. Þetta er líklega eitt af síðustu skiptunum sem innheimt verða afnotagjöld eins og hv. þingmanni er kunnugt þar sem verið er að breyta formi á innheimtu gjalda til Ríkisútvarpsins í svokallað útvarpsgjald. Sú innheimta mun breytast en ég mun taka til greina þær ábendingar sem hér koma fram og kanna hvernig að þessum málum er staðið hjá Ríkisútvarpinu.