aðgerðir til að bregðast við fjárhagsvanda íslenskra heimila og atvinnulífs.

Herra forseti. Þetta var mjög myndlíkingarík ræða og af því að Framsóknarflokkurinn er nú guðfaðir ríkisstjórnarinnar hlýtur hann náttúrlega að bera ábyrgð á henni.

Hv. þingmaður líkti þessu við slys. Við skulum hugsa okkur að þrír lendi í slysi og að þrír aðstoðarmenn eða hjálparmenn séu á staðnum í hjálparsveitinni og fimm áhorfendur. Það sem Framsóknarflokkurinn ætlar að gera er að skófla öllu liðinu á sjúkrahús, láta skera af þeim lappirnar o.s.frv. Ég veit ekki hvort það er mjög gáfulegt.

Hv. þingmaður sagði líka að það sem stæði í Alþjóðagjaldeyrissjóðnum væri skuldastaða ríkissjóðs. Samt er hér verið að leggja til að skuldastaðan verði aukin, með Íbúðalánasjóði og öðru, upp á hundruð milljarða. Halda menn að það standi ekki dálítið í Alþjóðagjaldeyrissjóðnum?

Svo er það spurning hvenær þetta á að taka gildi. Spurningin er sú hvort að einhver maður geti nú farið í banka, tekið 100 millj. kr. lán, lagt það inn á bankabók, sem er sett að veði fyrir láninu og það alveg gulltryggt, og fengið 20 millj. kr. afslátt af öllu saman.