aðstoð við VBS og Saga Capital.

Herra forseti. Ég ætlaði eiginlega að taka upp þráðinn þar sem hv. þm. Árni Þór Sigurðsson skildi við hann þegar hann var að ræða um aðgerðir í þágu heimila og fyrirtækja. Það er reyndar þannig að afar margir eru sammála um að þessi ríkisstjórn hafi ekki gert nægilega mikið fyrir heimilin og fyrirtækin í landinu. Það erum ekki bara við sem erum í stjórnarandstöðu sem erum þeirrar skoðunar. Sú skoðun hefur, eins og kom fram hér í umræðunni, komið fram af hálfu Framsóknarflokksins (Gripið fram í.) og Framsóknarflokkurinn er í þeirri undarlegu stöðu að segjast vera í stjórnarandstöðu en er samt í flestum málum einhvers konar fylgiflokkur eða fylgihnöttur ríkisstjórnarinnar.

Hins vegar sagði formaður Framsóknarflokksins í viðtali í sjónvarpinu á dögunum — og ég tek það fram að formaður Framsóknarflokksins hefur verið í sérstöku sambandi við forustumenn ríkisstjórnarinnar og átt með þeim fundi og fengið upplýsingar um þau mál sem þar eru í deiglunni, þannig að hann ætti að þekkja betur til málefna ríkisstjórnarinnar en venjulegir stjórnarandstæðingar — en hann sagði í viðtali við sjónvarpsfréttir 24. mars síðastliðinn um verkefni ríkisstjórnarinnar:

„Það vantar þau þingmál sem þessi stjórn var mynduð um. Sérstaklega vantar róttækari aðgerðir til að bregðast við efnahagsvandanum.“

Sigmundur Davíð Gunnlaugsson lýsti síðan alvarlegum vandamálum, bæði í efnahags- og atvinnumálum, sem við er að glíma og endaði viðtalið á orðunum:

„Við þessar aðstæður er spurningin ekki sú hvernig gangi að koma í gegn ýmsum almennum málum sem vel geta beðið fram yfir kosningar. Spurningin er sú hvers vegna ekki er búið að koma með þessar bráðaaðgerðir til að taka á vandanum.“

Síðan þetta viðtal var flutt hefur ekki komið neitt nýtt mál inn í þingið frá ríkisstjórninni. Þetta var sá dómur sem formaður Framsóknarflokksins sem fylgist sérstaklega vel með málefnum ríkisstjórnarinnar felldi um störf hennar á þessu sviði.